ကြည့်ရှုခွင့် ပိတ်ထားသော ၀က်ဘ်ဆိုက်အချို့ ပြန်ဖွင့်ပေးသည့် သတင်း အလုံးစုံမှန်ကန်မှု မရှိ

ပြည်တွင်း၌ ကြည့်ရှုခွင့် ပိတ်ပင်ထားသည့် ၀က်ဘ်ဆိုက်အချို့ကို ပိတ်ပင်ခြင်းမပြုတော့ဘဲ ပြန်လည် ကြည့်ရှုခွင့်ရလာခဲ့သည် ဆိုသော သတင်းမှာ အလုံးစုံမှန်ကန်မှုမရှိကြောင်း အင်တာနက်သုံးစွဲသူများ ထံမှ သိရှိရပါသည်။

ပြီးခဲ့သည့် ရက်များအတွင်း ပိတ်ပင်ထားသော ၀က်ဘ်ဆိုက်အချို့ဖြစ်သည့် Youtube ၊ Blogger ၊  Twitter အစရှိသော လူမှုကွန်ရက် ဖျော်ဖြေရေးဝက်ဘ်ဆိုက်များနှင့် irrawaddy ၊ mizzima ၊bbc Burmese နှင့် rfa အစရှိသော ၀က်ဘ်ဆိုက်များကို ပိတ်ပင်ထားရာမှ ပြန်ဖွင့်ပေးခဲ့သည့် သတင်းများ ထွက်ပေါ်ခဲ့ခြင်း ဖြစ်ပါသည်။

“ပြန်ဖွင့်ပေးတာ ဟုတ်လား၊ မဟုတ်လား ဆိုတာတော့ ပြောရခက်ပါတယ်။ ဒီနေ့ရပြီး မနက်ဖြန် မရတော့တဲ့ ပုံစံမျိုးဖြစ်နေတယ်။ အခုထိတော့ Youtube နဲ့ Twitter က ရနေသေးတယ်။ ကျန်တဲ့ဟာ အများစုကတော့ မရတော့ဘူး။ စမ်းနေတယ်လို့ပဲ ထင်ပါတယ်” ဟု အင်တာနက်ကဖေးဆိုင် ပိုင်ရှင်တစ်ဦးက ပြောပြပါသည်။

ပိတ်ပင်ထားသော ၀က်ဘ်ဆိုက်များ ပြန်ဖွင့်ပေးခဲ့သည့်သတင်း နှင့်ပတ်သက်၍ သက်ဆိုင်ရာ တာဝန်ရှိသူများအား မေးမြန်းခဲ့သော်လည်း တာဝန်ယူ ဖြေကြားပေးနိုင်မည့်သူ မရှိခဲ့ကြောင်း သိရပါသည်။
“ပိတ်ထားတဲ့ ၀က်ဘ်ဆိုက် တချို့ဒီအတိုင်း ကြည့်လို့ရလာပြီဆိုတာက ခဏတာပါပဲ။

ဝက်ဘ်ဆိုက်တွေ ပြန်ပွင့်လာရင်တော့ အကောင်းဆုံးပါ။ မပိတ်သင့်တဲ့ ဆိုက်တွေအများ ကြီးရှိပါတယ်”ဟု ကွန်ပျူတာပညာရှင် အသင်းမှ တာဝန်ရှိသူတစ်ဦးက ပြောကြားခဲ့သည်။

အစိုးရသစ် လက်ထက်တွင် မီဒီယာနှင့်ပတ်သက်ပြီး ပွင့်လင်းမှုရှိသော အခြေအနေတစ်ရပ်သို့ ရောက်ရှိရန် ကြိုးပမ်းနေချိန်၌ အချို့သော ၀က်ဘ်ဆိုက်များကို ပိတ်ထားဆဲဖြစ်ကြောင်း ရိုက်တာသတင်းဌာနမှ ဦးအောင်လှထွန်းက ပြောပြပါသည်။

“ဒီရက်ပိုင်းမှာ ပိတ်ထားတဲ့ ၀က်ဘ်ဆိုက်တစ်ချို့ ဖွင့်ပေးလိုက်တယ်ကြားတော့ ချီးကျူးမလို့ပဲ ရှိနေသေးတယ်၊ နောက်ရက်မှာ ပြန် ပိတ်သွားတယ်။ ပိတ်ထားတာတွေကတော့ နိုင်ငံရေး ၀က်ဘ်ဆိုက်မှတော့ မဟုတ်ပါဘူး။ တော်တော်များများကို ပိတ်ထားတာ။ တစ်ခါတလေ စဉ်းစားမိတယ်။ ပိတ်ထားတဲ့ ၀က်ဘ်ဆိုက် ဘာရေးထားတယ် ဆိုတာကို သိရဲ့လား မသိဘူး”ဟု ဦးအောင်လှထွန်းက ပြောကြားခဲ့ပါသည်။

ဦးအောင်လှထွန်းသည် ပြီးခဲ့ သည့် သြဂုတ်လအတွင်းက ပြုလုပ်ခဲ့သော နိုင်ငံတော်အဆင့် သတင်း စာရှင်းလင်းပွဲတွင် ရိုက်တာသတင်း ၀က်ဘ်ဆိုက်အား ပိတ်ပင်ထားမှုနှင့် အတူ အင်တာနက်ဝက်ဘ်ဆိုက် များ ပိတ်ပင်ထားခြင်းအား မေးခွန်းမေးမြန်းခဲ့သူ ဖြစ်ပါသည်။

“ဒီခေတ်မှာတော့ ပိတ်တယ်ဆိုတိုင်း မလုံတော့ပါဘူး။ အခုလိုပိတ်ထားခြင်းအားဖြင့် နိုင်ငံအတွက် ဂုဏ်သိက္ခာကျစရာ၊ လူငယ်တွေအတွက် နစ်နာဆုံးရှုံးစရာတွေ ပဲ ဖြစ်လာမှာပါ။ နောက်ပြီး နိုင်ငံတော်သမ္မတက လည်း သတင်းမီဒီယာနဲ့ ပတ်သက်ပြီး အလေးထား ပြောထားခဲ့ပြီးပါပြီ”ဟု ဦးအောင်လှထွန်းက ဆက်လက် ပြောပြပါသည်။

လက်ရှိအချိန်တွင် ဘန်ကောက်ပို့စ်၊ နေးရှင်း၊ စထရိတ်တိုင်းမ် အစ ရှိသော သတင်းစာများကို ပြည်တွင်း ၌တရားဝင်ဖြန့်ချိခွင့် ရရှိထားသော်လည်း အဆိုပါသတင်းစာများ၏ ၀က်ဘ်ဆိုက်များကို  ကြည့်ရှုခွင့် ပိတ်ပင်ထားခြင်းမှာ သဘာဝမကျကြောင်း သတင်းမီဒီယာသမားတစ်ဦးက ပြောပါသည်။ ထို့အပြင် ပိတ်ပင်ထားသော ၀က်ဘ်ဆိုက်များထဲတွင် CNN ၊ ABC ၊ BBC ၊ Reuters အစရှိသော သတင်းဝက်ဘ်ဆိုက်များ ပါဝင်နေခြင်းမှာလည်း ခေတ်နောက်ပြန်ဆွဲသော အခြေအနေဖြစ်နေကြောင်း Weekly Eleven News  ဂျာနယ်မှအယ်ဒီတာချုပ် ကိုဝေဖြိုးက သုံးသပ်ပါသည်။

“CNN ၊ ABC ၊ BBC ၊ Reuters အစရှိတဲ့ သတင်းဝက်ဘ်ဆိုက်တွေ အထူးသဖြင့်တော့ အမေရိကန် သတင်းဝက်ဘ်ဆိုက်တွေ ပိုများနေပါတယ်။ သတင်းတွေကို ကြည့်ချင်တဲ့သူတွေက ကြည့်မရဘူး ဖြစ်နေတယ်။ အခုရက်ပိုင်းမှာလည်း ၀က်ဘ်ဆိုက်တချို့ ဖွင့်တယ်ပြောတယ်။ ပြီးတော့ပြန်ပိတ်သွားတယ်။ ဖွင့်လိုက်၊ ပိတ်လိုက်လုပ်ရမယ့် အချိန်မဟုတ်တော့ပါဘူး”ဟု Weekly Eleven News သတင်း ဂျာနယ်မှ အယ်ဒီတာချုပ် ကိုဝေဖြိုး က ပြောပါသည်။

ကြည့်ရှုခွင့် ပြန်ဖွင့်ပေးလိုက်သော ၀က်ဘ်ဆိုက်အချို့တွင် Youtube ၀က်ဘ်ဆိုက် ပါဝင်သော်လည်း ထိုဝက်ဘ်ဆိုက်မှာမူ နှေးကွေးနေသော အင်တာနက်မြန်နှုန်းဖြင့် အဆင်ပြေမှုမရကြောင်း သိရသည်။
“ Youtube နဲ့ Twitter တွေတော့ သုံးဖြစ်တယ်။ ပွင့်လာတာတစ်ပတ်လောက် ရှိပါပြီ။ Blogspot တွေ က ခဏပဲရပြီး ပြန်ပိတ်သွားပါတယ်။ အရင်တုန်းကလည်း ခဏတစ်ဖြုတ် ပွင့်လာတာမျိုး ရှိတတ်လို့ ဖွင့်ပေးတာလား၊ ခဏဖြစ်တာလား ဆိုတာ ကြည့်ရပါဦးမယ်။ နိုင်ငံရေးနဲ့ မဆိုင်ဘဲ အသုံးဝင်တဲ့ဆိုက်တွေ အားလုံးဖွင့်ပေးရင် ပိုကောင်းပါ တယ်”ဟု အင်တာနက် အသုံးပြုသူတစ်ဦးက ပြောကြားခဲ့သည်။

Source: Eleven Media Group