Hpyen tai nga sai N’gawn Hpyen ni bai gayin wa na, KIO saw shaga

Myen asuya hpyendap maga tsap nna hpyen tai nga sai J.W N’gawn Hpyen ni yawng, “Jinghpaw Wunpawng amyusha ni myit mang langai sha kahkyin gumdin lam a matu,” lawan dik bai gayin wa na KIO saw shaga dat sai . Ya na zawn sadi jaw saw shaga ai lam hpe October 20, daini bat Mali Ya shani shapraw ai KIO a ndau shabra laika hta mu lu ai. Ndau hta, “Makawp Maga Hpyen Hpung (Pyi-tu-sit) nkau mi gaw Myen Asuya Hpyendap hte pawng nna KIO hpe gasat lawm nga ai lam ni byin nga sai,” nga ai. Dai re majaw, “Amyu sha shada kahkyin gumdin nhtawm shada makawp maga na malai, hpyen tai nga sai Makawp Maga Hpyen Hpung (Pyi-tu-sit) ni yawng Amyu Sha myit hkrum lam hta lawan dik gayin wa nna Amyu Sha shada pawng hpawm kahkyin gumdin na matu saw shaga dat ai,” nga nna, ndau hta matut mu lu ai.



 Ya ten, Naypyitaw Myen ginjaw asuya de sadi dung ai J.W laknak hpai hpung yawng 7 nga ai hta, 3 gaw Jinghpaw mungdaw hta rai nna, ngam ai gaw Lahta Sam mung kaw re. Jinghpaw mungdaw hta, Hkawnglanghpu-daju Lauban Ah Dang woi awn ai Rawang Pyi-tu-sit RRF (Tawng-chyan-tu san-chyin-ye ahpoi), Lawayang N’gawn Hpyen Hpung (shawng de Lasang Awng Wa Simsa Lam Hpung) hte Pangwa-daju Jarit Sin Dap (shawng de Zahkung Ting Ying woi awn ai New Democratic Army-Kachin) ni re. Bai, nna Lahta Sam mung kaw nga ai J.W n’gawn hpyen hpung ni gaw, Kutkai N’gawn Hpyen (Slg. Hkun Myat woi awn ai), Hpawng Seng N’gawn Hpyen (Slg. Lau Yawng woi awn ai), Mungpaw N’gawn Hpyen (Du Kying Mai hte kanau Du Mun woi awn ai), hte Kawng Hka N’gawn Hpyen (shawng de Mahtu Naw woi awn ai Kachin Defense Army) ni re. Ndai uhpung ni hta, Lasang Awng Wa Simsa Lam Hpung, NDA-K hte KDA uhpung ni gaw, kanu KIO/KIA kaw nna ga garan pru nna Myen ginjaw asuya de mahtang sadi dung ai uhpung ni re. Lai wa sai June 9 hta Myen hpyendap gaw KIO hpe dinghku majan baw dat sai hpang, lahta na uhpung 7 mung Myen maga gasat lawm nga sai lam, dai uhpung ni a shiga lawk hku chye lu ai. Source from..http://kachin.kachinnews.com/shiga/1960-hpyen-tai-nga-sai-ngawn-hpyen-ni-bai-gayin-wa-na-kio-saw-shaga.html